Janiattini
nta na costa , o manghignu,
'mpaisieddu, 'ncampanaru, na strata
na banchina, na porta sempri aperta,
'ncarusieddu ca joca a trinca
di prima matina.
Na fimmina ccu 'ncori
ranni assai
ca lava 'nta la pila
à la' buccuni.
'Ncanariu ca ti fa
scurdari i vai
na rasta i gelsuminu
'nto barcuni.
Lu ciauru ri 'nfurnu appiccicatu
cu fraschi sicchi
di virdi sataredda
lu pani cauru, iancu e sgriddatu
ammunsiddatu rintra na cruedda.
Ora ca ti lassai ti viru amicu
pinsannu a tuttu chiddu
ca ma ratu
mi sientu ntrarituri
nu minnicu
e cianciu riurdannu
lu passatu.